Operacioni i qeverisë për lirimin e hapësirave publike nga ndërtimet pa leje, në kuadër të programit “Rilindja Urbane 2.0”, vijon me intensitet në të gjithë territorin e vendit.

Kryeministri Edi Rama ka ndarë sot pamje të reja nga ndërhyrjet në çmontimin e strukturave ilegale që zënë hapësira publike.

“Ska pushim”, shkruan Rama.

Nisma, e nisur në muajin korrik, ka për synim rregullimin dhe kthimin e hapësirave publike në përdorim të komunitetit.

Një element kyç i operacionit është funksionimi i portalit qytetar “Hapësira ime publike”, i krijuar për të mundësuar denoncimin e ndërtimeve pa leje nga vetë qytetarët.

Sipas shifrave të fundit të bëra publike, portali ka rezultuar jashtëzakonisht aktiv:

Janë raportuar gjithsej 14,692 raste ndërtimesh pa leje.

Deri më tani, 11,160 raste janë zgjidhur (çmontuar ose legalizuar/rregulluar, në varësi të protokollit të ndërhyrjes).

Akoma në shqyrtim mbeten 3,532 raste të tjera, të cilat pritet të marrin një vendim.

Zbatimi i këtij programi pritet të vazhdojë në periudhën në vijim, duke sjellë më shumë hapësira për qytetarët në qytete dhe fshatra.

/rtsh.al/