Në emisionin “3D” në RTSH, nisja e hetimit penal nga SPAK ndaj Zëvendëskryeministres dhe Ministres së Infrastrukturës dhe Energjisë, Belinda Balluku, u shndërrua në një debat të ashpër mes analistëve mbi rëndësinë dhe motivimin politik të këtij hapi.

Analisti Zylyftar Bregu vlerësoi se rasti i Ballukut është më i madh se ai i Veliajt, duke pasur parasysh pozicionin e fuqishëm të ministres.

“Kemi të bëjmë me një ministre që ka shumë fuqi. Është goditja më e madhe e SPAK. Ballukun e godasin veprimet e saj. Nuk mendoj se ka prapaskenë politike. Hetimet kanë nisur si procedurë normale,” tha Bregu.

Beqiri: “Gjueti Shtrigash”

Avokati Idajet Beqiri pati një qëndrim thellësisht kritik ndaj SPAK-ut, duke e cilësuar hetimin si një “gjueti shtrigash” të motivuar politikisht.

“Po merret me ata që janë të urtë dhe jo me ata që bërtasin dhe e cilësojnë SPAK organizatë kriminale,” u shpreh Beqiri, duke argumentuar se Prokuroria duhet të merrej me “krime kundër njerëzimit” të viteve ’97, Gërdecit apo 21 Janarit. Sipas tij, SPAK po godet “nën ndikimin e politikës vrastare” dhe brenda saj “sundon fryma e Berishës“.

Kalaja: Rama në qendër të “katastrofës” së qeverisjes

Gazetari Aulon Kalaja e lidhi hetimin e Ballukut (për Tunelin e Llogarasë) me pozicionin e Kryeministrit Edi Rama.

“Rama ka ndërtuar një nga katastrofat e tij më të mëdha të qeverisjes, pasi dy personazhet kryesore të tij janë para drejtësisë,” tha Kalaja.

“Ai është një njeri që nuk do dysha“, tha ai.

/rtsh.al/