Siguria ushqimore dhe bllokimet e ushqimeve me pesticide mbi normat e lejuara janë kthyer shpesh në tema diskutimi në shoqëri dhe mediat publike, pikërisht se si mund të parandalohen këto raste. Në një intervistë për “Mirëmëngjes Shqipëri” në RTSH, ekspertja e sigurisë ushqimore, Ana Vuksani, ngriti shqetësimin për mungesën e kontrollit dhe transparencës në zinxhirin ushqimor.

“Produkte të tjera ka përveç mandarinave se ne njoftohemi vazhdimisht që kanë pesticide mbi normat e lejuara por ka edhe pesticidet që nuk lejohen nga BE. U informuam për rrushin, pjeshkat, ata nuk ishin prodhim vendas por ishin importe. Harta e llojeve dhe produkteve  është shumë më e gjerë se mandarinat. Ne diskutojmë për mandarinat se është sezoni i tyre dhe kjo pëlqehet shumë nga fëmijët dhe duke marrë parasysh rrezikun që ka në shëndet në të gjitha moshat”, u shpreh Vuksani.

Ekspertja theksoi se mbetjet e pesticideve nuk hiqen as me larje, as gjatë përpunimit, pasi ato kalojnë nga fruti deri në produktin përfundimtar.

“Problemi më i madh për mua është e para një viti janë bërë analizat e vajit të ulliri dhe mbetjet e pesticideve po komprometojnë edhe atë produkt që ne mburremi me cilësinë e  vajit të ullirit,. Mbetjet e pesticideve nuk hiqen as me larjen e produktit as gjatë procesit të përpunimit por ato mbeten atje dhe derivojnë nga fruti deri në produkt. Nga analizat e bëra kishte mbetje të pesticideve dhe në këtë rast nuk diskutohet më cilësia por siguria është i shëndetshëm apo jo,” shtoi Vuksani.

Ekspertja akuzon institucionet përgjegjëse për mungesë veprimi dhe koordinimi.

“Përgjegjës për sigurinë ushqimore është Ministria e Bujqësisë që ka institucionet e varësisë që është AKU që ka detyrim që nga momenti që përpunohet deri sa del te konsumatori dhe AKVMB (Autoriteti i Veterinarisë dhe Mbrojtjes së Bimëve) është përgjegjës për kontrollin në nivel ferme. I gjithë ky zinxhir janë dy institucionet dhe më pas vjen laboratori ISUV që bën analizat e produkteve. Kjo nuk është  e mjaftueshëm. Progres raporti i djeshëm theksoi se nuk ka asnjë progres në menaxhimin efektiv të sigurisë ushqimore, produktet shtazore kanë probleme të renda sa i përket gjurmimit, ka mungesë të kapaciteteve laboratorike dhe vlefshmërisë së këtyre analizave, nuk ka burime të mjaftueshme për inspektimet, ka mungesë transparencë të theksuar lidhur me nivelin e pesticideve të frutave-perimeve. Konsumatori është vazhdimisht i ekspozuar ndaj riskut të këtyre pesticideve”, tha ajo.

Në fund, Vuksani ngriti shqetësimin edhe për etiketimin e produkteve ushqimore, veçanërisht atyre shtazore dhe të bulmetit.

“Në etiketë të vetmin informacion qe ti merr është jetëgjatësia e produktit, elementet që përmban lidhur me alergjitë dhe origjinën e produktit ku është prodhuar. Ne kemi problem shumë të madh me etiketimin e produkteve shtazore nuk i kanë ato. Institucionet duhet të rishikojnë legjislacionit për etiketimin e produkteve shtazore dhe produkteve të bulmetit që konsumatori të marrë informacionet e nevojshme”, tha Vuksani.

/rtsh.al/