Anija ushtarake RMS Richmond ka lundruar për herë të parë në ujërat territorialë të Republikës së Shqipërisë. Me gjatësi prej 133 metrash dhe gjerësi 16 metra fregata britanike, ajo u prit nga anija shqiptare “Iliria” për t‘u ankoruar në bregun e Adriatikut në Porto Romano.

Radio Televizioni Shqiptar sjell pamjet ekskluzive nga e para fregatë britanike e këtij klasi që ka mbërritur në Shqipëri. Një tur në bord na njeh nga afër që nga sistemi i armatimeve, pjesë e së cilës është edhe ky helikopter e deri tek fjetina dhe mënyra e jetesës në det që bën i gjithë ekuipazhi me mbi 200 persona në bordin e kësaj anije.

“Është hera e parë e imja këtu në Shqipëri. Është hera e parë që HMS Richmond ka qenë në Shqipëri në 30 vitet e saj të shërbimit. Në këtë dislokim kemi qenë duke mbështetur lirinë e lundrimit në të gjithë botën. Kështu që kemi operuar në Lindjen e Largët, në Detin e Kinës Jugore, nëpër Ngushticën e Tajvanit dhe gjithashtu në Detin e Kinës Lindore. Por kudo që kemi qenë, kemi mbështetur lirinë e lundrimit dhe rendin ndërkombëtar të bazuar në rregulla kudo që shkojmë. Më pëlqen shumë angazhimi i mbrojtjes që po bëjmë në të gjitha vendet e ndryshme ku kemi mundësi të vijmë”, tha Richard Camp, Komandanti i HMS Richmond.

Kjo anije ka mbërritur në vendin tonë në kuadër edhe  të 100 vjetorit të krijimit të forcave detare.

“Jam shumë i kënaqur që jam këtu në bordin e HMS Richmond sot, dhe jam i kënaqur që anija ndodhet në Porto Romano. Mendoj se kjo është pasqyrim i marrëdhënies vërtet të fortë dypalëshe midis Mbretërisë së Bashkuar dhe Shqipërisë nga perspektiva e mbrojtjes. Kjo është një marrëdhënie dypalëshe që shkon prapa me shekuj. Ne qëndruam krah për krah si aleatë gjatë Luftës së Dytë Botërore dhe qëndrojmë sërish si aleatë. Vizita e anijes është kulmi i një periudhe aktiviteti vërtet intensive midis Mbretërisë së Bashkuar dhe Shqipërisë. 50 studentë do të vizitojnë Shqipërinë, sërish një tregues tjetër i asaj sa e fortë është marrëdhënia dypalëshe midis Mbretërisë së Bashkuar dhe Shqipërisë”, tha Nën Kolonel David Strong-Atashé i mbrojtjes i Mbretërisë së Bashkuar në Shqipëri.

Kapiten lejtnant, Lorenc Demiri thekson rëndësinë e ardhjes së gjigandit britanik.

“Me këtë klas anijesh, unë kam dhe lidhje të veçanta pasi gjatë studimeve në Kolegjin e Luftës në Britani, praktikën, pra vlerësimin tim si oficer karriere e kam bërë në anijen HMS Richmond, anija e parë fregat ndonjëherë në Shqipëri që është ankoruar në portet shqiptare”, tha Demiri.

Për Shqipërinë, vizita e HMS Richmond shënon një moment të rëndësishëm simbolik dhe strategjik, në një kohë kur vendi është bërë një nyje logjistike e rëndësishme për operacionet detare të NATO-s në Adriatik dhe Mesdheun Lindor.

Gazetare: Elda Hasanbelli 

/rtsh.al/