Lufta kundër emigracionit të paligjshëm dhe krimit të organizuar merr një dimension të ri rajonal. Duke nisur nga sot, Task Forca e Përbashkët për Migracionin, e krijuar fillimisht mes Britanisë së Madhe, Shqipërisë dhe Kosovës, është zgjeruar zyrtarisht me dy anëtarë të rinj: Malin e Zi dhe Maqedoninë e Veriut.

Ky zgjerim, sipas njoftimit për shtyp të policisë, krijon një front operacional të konsoliduar përballë fenomeneve shqetësuese të kohës, “duke u fokusuar jo vetëm te lëvizjet migratore ilegale, por edhe te gjurmimi dhe goditja e aseteve të krimit”.

Proda: Më shumë se protokoll, një kapitull i ri

Gjatë takimit që zyrtarizoi këtë bashkëpunim, Drejtori i Përgjithshëm i Policisë së Shtetit, Ilir Proda, e cilësoi pjesëmarrjen e vendeve të rajonit si një mundësi reale për rezultate konkrete dhe jo thjesht si një procedurë diplomatike.

“Prania juaj sot këtu është më shumë se protokoll – është një mundësi reale për të hapur një kapitull të ri bashkëpunimi rajonal,” u shpreh Proda.

Ai theksoi gatishmërinë e Shqipërisë për të marrë rol lider në ndarjen e eksperiencës së fituar nga bashkëpunimi i deritanishëm me palën britanike.

“Ne jemi të gatshëm të ndajmë modelet tona operative, të ofrojmë eksperiencën e Task-Forcës sonë dhe të ndërtojmë mekanizma të përbashkët për parandalim, verifikim dhe goditje të krimit ndërkufitar,” tha ai.

Strategjia e re, teknologji dhe operacione të sinkronizuara

Për të pasur sukses në këtë luftë të përbashkët, Proda prezantoi një qasje të bazuar në pesë shtylla kryesore operacionale:

• Shkëmbim informacioni në kohë reale.
• Verifikime më të shpejta të personave të dyshuar.
• Operacione të sinkronizuara mes policive të pesë shteteve.
• Standarde të unifikuara pune.
• Përdorim i teknologjive moderne për monitorim dhe hetim.

Rezultatet dhe angazhimi

Në mbyllje të fjalës së tij, Proda nënvizoi se Shqipëria mbetet një partner i besueshëm për aleatët ndërkombëtarë, duke sjellë si argument suksesin e arritur deri tani në frenimin e gomoneve drejt Britanisë.

“Rezultatet e deritanishme tregojnë se kur punojmë së bashku, migracioni i paligjshëm, rrjetet kriminale dhe trafiku ndërkufitar mund të frenohen në mënyrë të ndjeshme,” përfundoi Proda.

/rtsh.al/