Situata e krijuar nga moti i keq në zonat e prekura vazhdon të mbetet problematike. Në fshatrat Rrilë dhe Babullojë, të bashkisë Lezhë, banorët kërkojnë ndihmë emergjente.

Përmbytjes nuk i ka shpëtuar as kisha e Barbullojës. Mesa duket nuk mjaftojnë vetëm lutjet. Famullitari Padre Dario shprehet i shqetësuar.

“Uji fillimisht hyri në pjesën mbrapa dhe më pas, pasdite uji u fut edhe brenda kishës”, u shpreh ai.

Në zonat e përmbytura, banorët kërkojnë ndihmë në këtë situatë të vështirë.

Ndërkohë, Lumi Seman ka dalë nga shtrati në fshatrat e bashkisë Dimal, duke përmbytur serat bujqësore dhe stanet e bagëtive. Uji ka arritur deri në një metër lartësi në Goriçan, duke dëmtuar prodhimin dhe duke detyruar blegtorët të largojnë bagëtitë.

“Kam një pjesë toke ku ka futur disa koshere bletë, nuk e  di a janë përmbytur, nuk kam mundësi t’i shoh”, tha një banorë.

“Tokat i mbollëm grurë, tani i përmbyti lumi, nuk e dimë se çfarë do bëhet tani me ne”, u shpreh një tjetër.

Përmbytjet kanë prekur edhe shtëpitë në dy fshatrat e qarkut të Beratit, Çiflig dhe Arrëz. Uji ka hyrë deri në një metër në banesa, duke dëmtuar orenditë dhe pasuritë. Dëmet konstatohen në 110 banesa dhe 500 hektarë tokë bujqësore si pasojë e daljes së Lumit Osum nga shtrati.

/rtsh.al/