Në vijim të konsultimeve publike për buxhetin e vitit 2026, drejtuesja politike e Qarkut Tiranë, Ogerta Manastirliu, së bashku me ministren e Ekonomisë dhe Inovacionit, Delina Ibrahimaj, përfaqësues të Bashkisë së Tiranës dhe deputetë të zonës, zhvilluan një takim me banorët e Njësisë nr. 1 në kryeqytet.

Gjatë prezantimit të vizionit “Shqipëria 2030”, Manastirliu theksoi se përmirësimi i infrastrukturës në lagjet e Tiranës dhe krijimi i më shumë hapësirave publike do të jenë ndër prioritetet kryesore të buxhetit të ri.

Ajo nënvizoi se dialogu me komunitetin është thelbësor për të adresuar shqetësimet e qytetarëve dhe për t’i reflektuar ato në politikat e qeverisë.

“Një prej prioriteteve tona mbetet infrastruktura brenda zonave të banimit, e shoqëruar me operacionin e çlirimit të hapësirave publike. Bashkia do të vendosë një fond të posaçëm për këto projekte, që do të shtrihen jo vetëm në njësinë nr. 1, por në të gjithë Tiranën,” u shpreh Manastirliu.

Sipas saj, buxheti i vitit 2026 do të sjellë modele të reja zhvillimi urban, duke synuar hapësira më cilësore për qytetarët, si në lagjet tradicionale, ashtu edhe në zonat e reja të kryeqytetit. Ajo shtoi se ndryshimet ligjore për kontrollin e territorit do të garantojnë që çdo rezidencë e re të ketë hapësira të dedikuara për fëmijët dhe të moshuarit.

Manastirliu theksoi gjithashtu se rregullorja e re për hapësirat e çliruara do të shoqërohet me një mekanizëm shtesë për gjelbërimin e zonave, ku bizneset që përfitojnë hapësira për shfrytëzim do të kontribuojnë me fonde të dedikuara.

“Zbatimi i kësaj rregulloreje do të jetë përgjegjësi e Bashkisë së Tiranës,” tha ajo.

Takimi u fokusua edhe tek mbështetja sociale që buxheti i ri parashikon për të moshuarit, familjet, punonjësit e administratës publike, si edhe profesionistët e shëndetësisë dhe arsimit, duke e përforcuar vizionin e qeverisë për një kryeqytet më funksional dhe më pranë nevojave të qytetarëve.

Manastirliu theksoi se buxheti i vitit 2026 synon të sjellë projekte të reja në të gjithë Tiranën, duke krijuar hapësira më cilësore për qytetarët, si në lagjet tradicionale, ato ekzistuese, por edhe në zonat e reja të kryeqytetit.

Ajo shpjegoi se ndryshimet ligjore për kontrollin e territorit do të garantojnë që çdo rezidencë e re të ketë ambiente të posaçme për fëmijët dhe të moshuarit.

“Rregullorja e re për hapësirat e çliruara do të shoqërohet me një mekanizëm shtesë për gjelbërimin e qytetit, ku bizneset që përfitojnë hapësira për shfrytëzim do të kontribuojnë me fonde të dedikuara,” u shpreh Manastirliu, duke theksuar se zbatimi i kësaj rregulloreje do të mbetet përgjegjësi e Bashkisë së Tiranës.

/rtsh.al/