Me mesazhin se kujtimi i së kaluarës mbetet udhërrëfyes për vlerat dhe unitetin e sotëm, në mbarë vendin u zhvilluan këtë 29 nëntor, aktivitetet përkujtimore në kuadër të 81 vjetorit të Çlirimit të vendit. Në Shkodër, autoritete vendore, veteranë të Luftës Antifashiste Nacionalçlirimtare nderuan sakrificën dhe kontributin e brezave që luftuan për liri.

“Me Çlirimin e Shkodrës, u çlirua e gjithë Shqipëria. Mujo Ulqinaku mbeti simbol i qënderesës antifashiste dhe i heroizmit të popullit shqiptar”, u shpreh Dhurata Tyli, Kryetare e Organizatës së Dëshmorëve, Shkodër.

Ceremoni përkujtimore edhe në Kukës e Has, ku u nënvizua se kjo dite duhet të shërbejë jo vetëm për të nderuar vlerat e luftës, por edhe si motiv për të kontribuar në përparimin e kombit shqiptar.

“Le të vazhdojmë ta ndërtojmë Shqipërinë me punë, duke mbajtur gjallë vlerat që na bashkojnë”, u shpreh Kryetari i Bashkisë Kukës, Albert Halilaj.

Ceremoni përkujtimore u zhvillua edhe në Lezhë, për të nderuar sakrificën dhe heroizmin e atyre që dhanë jetën për liri

Në Durrës të pranishmit theksuan rëndësinë e ruajtjes së kujtesës historike dhe vlerave të Luftës Nacionalçlirimtare. Në Qytetin e Flamurit,  u zhvilluan homazhe dhe u vendosën kurora me lule  pranë lapidarit  të dëshmorëve.

“Sot është edhe në ditë reflektimi për mënyrën sesi ne duhet t’i përkushtohemi dashurisë për Atdheun tonë”, u shpreh Kryetarja e Bashkisë, Bruna Mersini.

Në Gjirokastër, të pranishmit në homazhe nënvizuan se sakrifica e dëshmorëve mbetet themel i identitetit dhe lirisë sonë kombëtare.

“Lavdi Dëshmorëve, rroftë Shqipëria!”, uroi kryebashkiaku Flamur Golemi.   

29-Nëntori u kremtua edhe në qytetin e Fierit.

“Është një ndjenjë krenarie. Vlerat e luftës do të vijojnë të përçohen brez pas brezi”, tha kreu i Bashkisë, Armando Subashi.

Atmosferë e njëjtë në çdo qytet të vendit, në nderim të 28 mijë të rënëve në luftën anti-Fashiste Nacional Çlirimtare.

/rtsh.al/