Policia britanike arrestoi një të dyshuar të dielën, pasi disa persona kërkuan trajtim mjekësor pas një sulmi me sprej me piper në një parking automjetesh në aeroportin Heathrow.

Policia Metropolitane e Londrës tha se incidenti në parkingun e Terminalit 3 u shkaktua nga një konflikt mes një grupi personash që njiheshin me njëri-tjetrin, ndaj ngjarja nuk po hetohej si akt terrorist. Autoritetet shëndetësore në kryeqytetin britanik njoftuan se ekipet e urgjencës trajtuan 21 pacientë, pesë prej të cilëve u dërguan në spital. Policia vuri në dukje se lëndimet nuk ishin kërcënuese për jetën.

“Një grup personash u spërkatën me atë që besohet të jetë një lloj spreji me piper nga disa të tjerë, të cilët më pas u larguan nga vendi i ngjarjes”– tha Policia e Londrës duke konfirmuar se  një nga të dyshuarit ndodhet në paraburgim dhe hetimet vazhdojnë për të gjetur të dyshuar të tjerë.

 Aeroporti Heathrow njoftoi se ekipet e tij, ku u përfshinë edhe shërbimet e emergjencës, reaguan ndaj incidentit, ndërsa u bëri thirrje pasagjerëve që do të udhëtonin drejt aeroportit më të ngarkuar të Evropës që të niseshin më herët se sa e kishin parashikuar.

Terminali 3 i aeroportit nuk u mbyll gjatë ngjarjes, por zyrtarët thanë se incidenti shkaktoi trafik të rënduar dhe ndërprerje të transportit publik në zonë.

Gazetare: Vjollca Zharri

/rtsh.al/