Organizata Botërore e Shëndetësisë (OBSH) ka hapur një konferencë të madhe në New Delhi për mjekësinë tradicionale, duke theksuar se teknologjitë e reja, përfshirë inteligjencën artificiale, mund të sjellin prova shkencore mbi praktikat shekullore të shërimit.

Qëllimi i samitit është që qeveritë të rregullojnë mjekësinë tradicionale dhe ta integrojnë atë në sistemet moderne të kujdesit shëndetësor, duke siguruar trajtime të sigurta dhe efektive.

Shefi i OBSH-së, Tedros Adhanom Ghebreyesus, deklaroi se mjekësia tradicionale nuk është e së kaluarës, ndërsa kryeministri indian Narendra Modi e cilësoi takimin si një nxitje për shfrytëzimin e potencialit të saj.

Shyama Kurvilla, drejtuesja e Qendrës Globale të OBSH-së për Mjekësinë Tradicionale, theksoi se 40–90% e popullsive në shumicën e vendeve e përdorin këtë formë kujdesi, shpesh si opsionin e vetëm të disponueshëm. OBSH solli shembuj të suksesit të bazuar në produkte natyrore, si aspirina nga lëvorja e shelgut, pilulat kontraceptive nga patatja e ëmbël, trajtimet kundër kancerit nga lule rozë e Madagaskarit dhe artemisinina kundër malaries nga tekstet e lashta kineze.

Megjithatë, shumë trajtime nuk kanë prova shkencore, ndërsa kërkesa e lartë rrezikon biodiversitetin përmes trafikimit të kafshëve të egra.

OBSH do të lançojë gjithashtu bibliotekën më të madhe dixhitale në botë për mjekësinë tradicionale, me 1.6 milion të dhëna shkencore, për të forcuar bazën e provave dhe ndarjen e njohurive.

Sipas Dr. Sylvie Briand, inteligjenca artificiale mund të analizojë miliona komponime bimore, të identifikojë përbërësit aktivë dhe të minimizojë efektet negative, ndërsa teknologjitë e imazherisë po tregojnë ndikimin e praktikave si meditimi dhe akupunktura.

Në këtë mënyrë, OBSH e sheh mjekësinë tradicionale si një urë që lidh të kaluarën me të ardhmen, duke e rishikuar atë me rigorozitet shkencor falë IA-së dhe inovacionit teknologjik.

/rtsh.al/