Irani ka konfirmuar zyrtarisht për herë të parë se rreth 2 mijë persona janë vrarë gjatë protestave që kanë pushtuar gjithë vendin.

Sipas një zyrtari iranian që foli për Reuters, ky numër përfshin si civilë ashtu edhe personel sigurie, dhe zyrtari fajësoi protestuesit për vdekjet, ndërsa nuk ka pranuar përgjegjësinë e forcave qeveritare.

Ky është bilanci më i lartë zyrtar i konfirmuar deri tani në trazirat që kanë tronditur Republikën Islamike që nga fundi i dhjetorit 2025, fillimisht për shkak të krizës ekonomike të rëndë (rënia e monedhës, inflacioni i lartë, mungesat), por që shpejt u shndërruan në kërkesa të gjera anti-regjim.

Një media opozitare iraniane pretendon se numri real i vdekjeve është shumë më i lartë – rreth 12 mijë– dhe e përshkruan si një “masakër sistematike” të urdhëruar nga Udhëheqësi Suprem Ali Khamenei dhe të kryer nga IRGC.

Ky pretendim mbetet i paverifikuar dhe është shumë më i lartë se vlerësimet e tjera.Organizatat e pavarura për të drejtat e njeriut japin shifra më të ulëta, por ende të rënda: HRANA (Human Rights Activists News Agency) ka konfirmuar mbi 500–600 vdekje të protestuesve (disa raporte deri në 646, duke përfshirë fëmijë), plus qindra të tjerë në hetim, dhe mijëra të arrestuar (mbi 10,000).

Grupe të tjera si Amnesty International dhe Iran Human Rights kanë raportuar qindra vdekje në javët e para, me rritje dramatike pas 8–10 janarit, kur u vendos blackout i plotë i internetit që pengon verifikimin në kohë reale.

Protestat janë përhapur në të 31 provincat, me pamje të protestuesve që ndezin zjarre në rrugët e Teheranit.

/rtsh.al/