Zyrtarët e Hamasit kanë bërë të ditur grupi ka nisur bisedimet me ndërmjetësit egjiptianë në Kajro lidhur me formimin e një komiteti teknokratik për të qeverisur Gazën, si pjesë e planit të armëpushimit të ndërmjetësuar nga SHBA-të për territoret palestineze.

Sipas një programi 20-pikësh të propozuar nga presidenti amerikan Donald Trump në tetor të vitit 2025, Gaza do të administrohet nga një komitet tranzitor palestinez që do të veprojë nën mbikëqyrjen e Këshillit të Paqes, i cili do të drejtohet nga vetë Trump.

Takimi në Kajro mes delegacionit të Hamasit dhe ndërmjetësve egjiptianë synon të adresojë formimin e këtij komiteti, duke përfshirë mekanizmat e tij operativë, sipas një zyrtari të lartë të Hamasit që foli për AFP në kushte anonimiteti.

Ky zhvillim vjen në kuadrin e fazës së dytë të planit të Trumpit, pas një armëpushimi të brishtë që hyri në fuqi në tetor të vitit 2025.

Hamas ka shprehur gatishmëri për të dorëzuar pushtetin e tij administrativ në Gaza tek një komitet i tillë teknokratik (jo-politik dhe i pavarur), por ka rezerva të mëdha për çarmatimin e plotë të grupit, tërheqjen e forcave izraelite dhe detaje të tjera.

Bisedimet në Kajro vazhdojnë me Egjiptin, Katarin dhe Turqinë për kalimin në fazën e dytë, duke përfshirë formimin e komitetit (emrat e mundshëm të teknokratëve janë diskutuar, por ende nuk janë finalizuar plotësisht ose aprovuar nga të gjitha palët, përfshirë Izraelin dhe SHBA-të).

Armëpushimi mbetet i brishtë, me incidente të vazhdueshme dhune (mbi 400 palestinezë të vrarë që nga tetori sipas shifrave të Ministrisë së Shëndetësisë në Gaza), vonesa në ndihma humanitare dhe mosmarrëveshje mbi çarmatimin e Hamasit dhe kthimin e pengjeve të mbetura.

/rtsh.al/