Trajneri i Tiranës, Ardian Nuhiu, ka folur për mediat në prag të sfidës kundër Flamurtarit, që do të zhvillohet nesër në orën 13:30 në stadiumin “Selman Stërmasi” dhe do të transmetohet në rrjetin e Radio Televizionit Shqiptar. tekniku kërkon vazhdimësi në rezultate dhe synon vetëm fitoren përballë vlonjatëve.

“Çdo ndeshje për ne është finale, skuadra është e përkushtuar, është mobiluzuar për të qenë tek më e mira e tyre. Kundërshtarët kanë kualitet, i kanë idetë e qarta dhe mënyrën se si luajnë ata, jam munduar ta analizoj kundërshtarin, detajet bëjnë diferencën, skuadrën e pres të bashkuar. Më japin besim 3 ndeshjet të këtij viti që po përmirësohemi nga ndeshje në ndeshje.

Unë i besoj skuadrës dhe përmirësimit që po e marr nga grupi, duke grumbulluar pikë, dua vazhdimësi, nuk kemi të drejtë të gabojmë, nëse s’mund ta fitosh të paktën mos ta humbësh, dua të marrim maksimumin nesër.

Po e shfrytëzoj mundësinë për të uruar “Fanatics” për themelimin e tyre, një tifozeri me traditë dhe kulturë sportive, me shumë pasion. Suksesi i skuadrës tonë pa ta është e zbehtë, ata kanë qenë pranë skuadrës e kanë ndihmuar, kemi nevojë për ta, iu bëj thirrje të vijnë të mbështesin lojtarët, shoh dëshirë te lojtarët për ta nxjerrë Tiranën nga ky pozicion ku ndodhet”, ka thënë mes të tjerash Nuhiu.