Ministri i Mbrojtjes, Pirro Vengu, ka njoftuar përmes një postimi në rrjetin social Facebook një tjetër hap të rëndësishëm në kuadër të marrëveshjes trilaterale mes Shqipërisë, Kosovës dhe Kroacisë.

Sipas tij, shefat e shtabeve të tre vendeve kanë zhvilluar një takim të përbashkët, duke konfirmuar angazhimin për forcimin e bashkëpunimit në fushën e mbrojtjes dhe sigurisë.

Në postimin e tij, Vengu thekson se prioritetet kryesore të kësaj marrëveshjeje janë: më shumë bashkëpunim ushtarak; më shumë ndërveprueshmëri mes forcave të armatosura; dhe më shumë gatishmëri operacionale.

Ministri bëri të ditur se fokusi do të jetë në zhvillimin e stërvitjeve dhe trajnimeve të përbashkëta, me synim përballimin e sfidave të sigurisë dhe kërcënimeve hibride në rajon dhe më gjerë.

Sipas Vengut, viti 2026 do të shënojë organizimin e stërvitjes së parë trilaterale, në përputhje me Konceptin Strategjik të NATO-s dhe objektivat euroatlantike të tre vendeve.

“Një tjetër hap i rëndësishëm në kuadër të marrëveshjes trilaterale ndërmjet Shqipërisë, Kosovës dhe Kroacisë, ku shefat e shtabeve të tre vendeve zhvilluan një takim të përbashkët.

Më shumë bashkëpunim ushtarak

Më shumë ndërveprueshmëri

Më shumë gatishmëri operacionale

Fokus në zhvillimin e stërvitjeve dhe trajnimeve të përbashkëta për përballimin e sfidave të sigurisë dhe kërcënimeve hibride.

Viti 2026 do të presë stërvitjen e parë trilaterale, në përputhje me Konceptin Strategjik të NATO dhe objektivat euroatlantike”, shkruan Vengu në rrjetin social Facebook.

/rtsh.al/