Digjitalizimi i shërbimeve vendore nuk është më një opsion, por një domosdoshmëri për një qeverisje moderne dhe më pranë qytetarit. Ky ishte mesazhi kryesor që përcolli Ministri i Shtetit për Pushtetin Vendor, Ervin Demo, gjatë një takimi pune (workshop) të fokusuar te teknologjia në administrimin vendor.

Përmes një reagimi publik, Ministri Demo theksoi se roli i bashkive në këtë proces po ndryshon rrënjësisht.

“Në Workshop-in mbi digjitalizimin theksova se bashkitë janë aktorë qendrorë të këtij procesi, jo thjesht përdoruese të teknologjisë,” u shpreh ai.

Sipas Ministrit, objektivi kryesor i kësaj nisme është standardizimi i shërbimeve që ofrohen për qytetarët, pavarësisht se në cilën bashki jetojnë ata. Kjo do të garantojë akses të barabartë dhe rritje të transparencës. Demo nënvizoi se ky transformim është pjesë e reformës më të gjerë të qeverisjes publike dhe qasjes së re “GovTech”.

“Qëllimi ynë është standardizimi i shërbimeve, akses i barabartë për qytetarët dhe forcimi i kapaciteteve njerëzore në nivel vendor,” sqaroi ministri.

Në përfundim, Demo garantoi se Ministria e Shtetit për Pushtetin Vendor do të marrë rolin udhëheqës në këtë proces, duke bashkëpunuar ngushtë me të gjitha institucionet partnere për të modernizuar infrastrukturën dixhitale të pushtetit vendor.

/rtsh.al/