Të ruash biznesin apo shtëpinë me kamera sigurie është kthyer në një praktikë të zakonshme. Sot ato gjenden kudo, në lokale, rrugë, ambiente private si pjesë e teknologjisë që premton më shumë siguri. Por për një pjesë të shoqërisë, përdorimi i tyre po kalon kufijtë e arsyes, duke u shndërruar në një formë kontrolli të tepruar.

Kontrolli i bashkëshortëve përbën një ngjarje që hap debat mbi kufirin mes sigurisë dhe cenimit të privatësisë.

“Për sa i përket përdorimit të kamerave të sigurisë në ambiente të brendshme familjare prek të drejtat e njeriut. Të gjithë kemi të drejtë të jetojmë në konficialitet dhe të pa vëzhguar”, u shpreh Maria Dojçe, sociologe.

Sociologët e shohin këtë fenomen si tregues të frikës dhe pasigurisë në marrëdhëniet ndër personale.

“tregon gjendje të dobëta emocionale, ndërhyn drejtpërsëdrejti në privatësinë e personit që bashkëjeton”, tha ajo.

Sipas sociologëve, disa familje po shndërrohen në “burgje shtëpiake”, ku xhelozia dhe mosbesimi maskohen si nevojë për siguri. Përdorimi i kamerave në këtë formë është shprehje e një çrregullimi social dhe emocional.

Gazetare: Geralda Manushi

/rtsh.al/