Progresi i planit të paqes në Gaza ka ngecur për shkak të mosmarrëveshjeve mbi çarmatimin e Hamas, ndërsa Izraeli ka paralajmëruar rikthim në luftë të plotë nëse kushti nuk përmbushet brenda një afati të shkurtër.

Faza e dytë e armëpushimit, e ndërmjetësuar nga Shtetet e Bashkuara të Amerikës dhe e shpallur si e nisur në janar, parashikon çarmatimin e plotë të Hamasit, tërheqjen e forcave izraelite dhe krijimin e një administrate të përkohshme palestineze në Gaza. Plani përfshin gjithashtu mbështetjen nga një forcë policore palestineze dhe një forcë ndërkombëtare stabilizimi.

Megjithatë, plani me 20 pika, që sipas raportimeve do të mbikëqyret nga një Bord i Paqes i ngritur nga presidenti amerikan Donald Trump, mbetet i paqartë sa i përket renditjes së hapave dhe garancive për zbatimin e tij.

Ekspertët vlerësojnë se Hamasi ka gjasa ta refuzojë planin për shkak të mungesës së garancive se Izraeli do të tërhiqet pas dorëzimit të armëve. Sipas tyre, pa një mekanizëm të qartë ndërkombëtar që garanton përfundimin e operacioneve ushtarake, procesi rrezikon të dështojë.

Ministri izraelit i Financave, Bezalel Smotrich, deklaroi se në ditët në vijim Hamasit mund t’i paraqitet një ultimatum për çarmatim dhe demilitarizim të plotë të Gazës. Ai theksoi se, në rast mosbindjeje, forcat izraelite do të kërkojnë mbështetje ndërkombëtare për të ndërhyrë ushtarakisht.

/rtsh.al/