Përfaqësues të Partisë Demokratike të Shqipërisë kanë njoftuar Policinë e Tiranës për zhvillimin e një tubimi më datë 17 prill 2026, nga ora 19:00 deri në orën 22:00, në bulevardin “Dëshmorët e Kombit”, përpara godinës së Kryeministrisë.

Në zbatim të ligjit “Për tubimet”, Policia e Tiranës ka marrë masa për garantimin e rendit dhe mbarëvajtjes së këtij aktiviteti, duke parashikuar kufizime të përkohshme të qarkullimit në disa akse kryesore të kryeqytetit.

Sipas njoftimit zyrtar, nga ora 23:45 e datës 16 prill deri në përfundim të tubimit, do të bllokohet lëvizja dhe parkimi i automjeteve në segmentin e bulevardit “Dëshmorët e Kombit”, nga “Ura e Dajtit” deri te rruga “Ismail Qemali”.

Ndërkohë, nga ora 15:00 e datës 17 prill deri në përfundim të tubimit, do të ndalohet qarkullimi i automjeteve në të njëjtin bulevard, nga kryqëzimi pranë Ministrisë së Brendshme deri në sheshin “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Policia e Tiranës u bën thirrje organizatorëve të respektojnë orarin dhe vendin e përcaktuar për tubimin, ndërsa kërkon mirëkuptimin e qytetarëve për kufizimet e përkohshme në qarkullim. Gjithashtu, qytetarët ftohen të shmangin çdo veprim të kundërligjshëm që mund të cenojë rendin dhe sigurinë publike.

/rtsh.al/