Në kuadër të Ditës së Inovacionit, investimet në teknologji dhe zhvillim po japin ndikim të dukshëm edhe në institucionet arsimore në Shkodër.

Gjatë viteve të fundit, një fokus i veçantë i është kushtuar modernizimit të shkollave, ku tashmë 10 prej tyre janë pajisur me laboratorë inteligjentë “Smart Lab”, ndërsa 4 të tjera janë kompletuar me elemente të avancuara të teknologjisë së informacionit.

Synimi i autoriteteve është që çdo shkollë të pajiset me tabela inteligjente “smart board”, duke krijuar kushte më bashkëkohore për mësimdhënie dhe duke i afruar nxënësit me realitetin digjital.

Ndërkohë, inovacioni nuk mbetet vetëm në infrastrukturë, por reflektohet edhe në idetë dhe projektet e vetë nxënësve.

Vetëm pak javë më parë, gjimnazi “Jordan Misja” u evidentua për një projekt inovativ që synon parandalimin e përmbytjeve, një problematikë e ndjeshme për zonën. Ky angazhim tregon se të rinjtë po bëhen gjithnjë e më aktivë në zgjidhjen e sfidave reale përmes ideve kreative dhe përdorimit të teknologjisë.

Në një kohë kur zhvillimi teknologjik po avancon me ritme të shpejta, këto iniciativa dëshmojnë se e ardhmja po orientohet gjithnjë e më shumë drejt inovacionit.

Gazetare: M. Gjoni

/rtsh.al/