Dy persona janë arrestuar nga blutë e kryeqytetit pasi shisnin fenelina dhe pajisje të tjera si ato që përdor Policia.

Në kuadër të operacionit policor të koduar “Signals”, ku janë zbuluar dy dyqane ku tregtoheshin në mënyrë të paligjshme fenelina dhe pajisje të tjera të ngjashme me ato që përdor Policia e Shtetit, janë arrestuar në flagrancë shtetasit Xh. T., 23 vjeç dhe H. L., 41 vjeç, të dy banues në Tiranë.

Sipas Policisë, gjatë kontrolleve të ushtruara në dyqanet e tyre, të vendosura në rrugën “Konferenca e Pezës”, janë gjetur dhe sekuestruar dhjetëra fenelina dhe pajisje të tjera të ngjashme me ato zyrtare të Policisë. Dy shtetasit nuk dispononin dokumentacion mbi origjinën e mallrave, as autorizim përkatës për mbajtjen dhe tregtimin e tyre.

Policia bëri të ditur se operacioni u zhvillua në vijim të kontrolleve dhe punës hetimore për evidentimin dhe goditjen e paligjshmërive, bazuar edhe në informacione të siguruara në rrugë operative.

Materialet procedurale i janë referuar Prokurorisë për veprime të mëtejshme.

/rtsh.al/