Vendimi i Pentagonit për të tërhequr 5,000 trupa amerikane nga Gjermania ka hasur në një kundërshti të fortë nga radhët e vetë Partisë Republikane në Kongres. Kryetarët e komiteteve të Shërbimeve të Armatosura në Dhomën e Përfaqësuesve dhe në Senat shprehën shqetësimin e tyre të thellë, duke e cilësuar lëvizjen si të rrezikshme për stabilitetin e NATO-s.

Senatori Roger Wicker dhe përfaqësuesi Mike Rogers lëshuan një deklaratë të përbashkët ku theksonin se Gjermania ka përmbushur kërkesat e SHBA-së për rritjen e shpenzimeve të mbrojtjes dhe ka ofruar mbështetje jetike logjistike për operacionet ushtarake amerikane.

“Gjermania ka rritur ndjeshëm shpenzimet e mbrojtjes dhe ka siguruar akses e fluturime pa ndërprerje për forcat tona në mbështetje të Operacionit Epic Fury,” deklaruan Wicker dhe Rogers, duke kundërshtuar argumentin se Berlini nuk po kontribuon mjaftueshëm.

Prapaskena politike, përplasja Trump-Berlin

Tërheqja e trupave vjen pas një klime të tensionuar mes Presidentit Donald Trump dhe krerëve gjermanë. Shkak i këtij vendimi besohet të jenë kritikat e forta të kancelarit gjerman ndaj politikave të Uashingtonit në luftën me Iranin. Pentagoni konfirmoi të premten se procesi i tërheqjes do të zgjasë gjatë vitit të ardhshëm.

Propozimi për zhvendosje në Lindje

Për të mos dobësuar mbrojtjen kolektive të aleancës, drejtuesit republikanë i kërkuan Pentagonit që këto trupa të mos kthehen në SHBA, por të zhvendosen drejt vendeve të Evropës Lindore.

Arsyeja sipas tyre është se aleatët e krahut lindor kanë investuar shuma të konsiderueshme për të pritur forcat amerikane.

Objektivi është forcimi i vijës së frontit të NATO-s për të parandaluar konflikte më të kushtueshme në të ardhmen.

Ligjvënësit paralajmëruan se çdo ndryshim i rëndësishëm në praninë ushtarake në Evropë duhet të kalojë përmes një procesi të koordinuar me Kongresin dhe aleatët. Ata presin që Pentagoni të japë llogari përpara komiteteve mbikëqyrëse, duke insistuar se vendime të tilla nuk mund të merren në mënyrë të njëanshme pa një shqyrtim të detajuar strategjik.

/rtsh.al/