Kryedemokrati Sali Berisha reagoi ashpër ndërkohë që zhvillohej protesta e Partisë Demokratike, duke akuzuar policinë për bllokimin e marshimit paqësor të opozitës drejt Ministrisë së Brendshme.

“Do të marrin përgjigjen e merituar. Ju e patë, ishim në një marshim paqësor. Dhe marshimi ynë paqësor, u shkelmua Kushtetuta, u shkelmua çdo gjë, u bllokua rruga. Dhe këta në mënyrë absolute do marrin përgjigjen e merituar. Këta kanë kryer një krim të shëmtuar sot sepse ne po bënim marshimin tonë, marshim paqësor në kuptimin e vërtetë të fjalës. Por Edi Balluku dhe Lubi Rama vend në këtë tokë nuk kanë pa shkuar para ligjit”, deklaroi Berisha.

Ai e cilësoi veprimin e forcave të policisë si “një krim të shëmtuar”, duke theksuar se protestuesit po kryenin një marshim paqësor.

Kur Berisha u pyet nga gazetarët se pse opozita nuk u lejua të marshonte drejt Ministrisë së Brendshme, Berisha u përgjigj: “Ne po marshonim, ata bllokuan bulevardin, po ne do përgatitemi për të gjitha format, dhe i garantoj se e kanë të humbur 100 përqind. Turpe. Mbrojnë dy kriminelë si Edi Rama dhe Belinda Balluku. Mbrojnë Linda Ramën dhe Mirlindën e AKSHI-t. Mbrojnë hajdutë të shpërfytyruar të këtij kombi. Dhe këtë e bën një mercenar, se do u tregojmë se cili është Skënder Balluku”.

Ndërkaq, më herët vetë Berisha ra pre e goditjes me ujë nga policia. Teksa protestuesit kishin nisur marshimin drejt Ministrisë së Brendshme, forca të shumta policie u kanë hedhur gaz lotsjellës dhe ujë. Ashtu siç shihet edhe në video, autoboti me ujë është drejtuar nga kreu i PD-së Berisha ndërsa disa protestues janë afruar me çadra për ta mbrojtur.

/rtsh.al/