Në emisionin “3D”, ndërsa komentoi protestën e opozitës të mbajtur mbrëmjen e së premtes, juristi Redi Ramaj ka deklaruar se e drejta për të protestuar është një e drejtë themelore kushtetuese.

“Në përgjithësi, dhe nga praktika e protestave të ndryshme, jo vetëm të Partisë Demokratike, policia kërkon gjithmonë paraprakisht përcaktimin e një perimetri ose zone ku do të zhvillohet protesta, për arsye sigurie.Megjithatë, në asnjë rast nuk është e garantuar që kjo zonë të respektohet plotësisht sipas njoftimit paraprak gjatë zhvillimit të protestës.

Në Shqipëri, referuar legjislacionit për tubimet publike dhe praktikës gjyqësore në vite, e drejta për të protestuar konsiderohet një e drejtë themelore kushtetuese, e mbrojtur dhe e garantuar. Gjykatat në përgjithësi kanë mbajtur qëndrimin se thelbi i kësaj të drejte nuk duhet të cenohet për shkak të shkeljeve të vogla formale, si devijime të kufizuara nga perimetri i njoftuar më parë”, tha ai.

Ai shprehu kritika ndaj qëndrimeve të policisë së shtetit ku sipas tij, më e rëndësishme është garantimi i së drejtës për tubim sesa ndëshkimi i menjëhershëm për tejkalime të vogla të kufijve të përcaktuar paraprakisht.

Ramaj theksoi gjithashtu se sipas tij ndërhyrjet e policisë duhet të jenë proporcionale dhe të synojnë de-eskalimin e situatës, duke shmangur përshkallëzimin e tensioneve. Sipas tij, bllokimi i plotë i protestuesve apo përdorimi i forcës së tepruar mund të rrisë konfliktin në vend që ta ulë atë.

Në shumë raste, është theksuar se më e rëndësishme është garantimi i së drejtës për tubim dhe shprehje publike, sesa ndëshkimi i menjëhershëm për tejkalime të vogla të kufijve të përcaktuar paraprakisht. Megjithatë, kjo nuk përfshin situatat kur ka dhunë, dëmtime të pronës apo rrezik për sigurinë publike, të cilat trajtohen si shkelje të patolerueshme.

Nga ana tjetër, është vlerësuar se ndërhyrjet e policisë duhet të jenë proporcionale dhe të synojnë de-eskalimin e situatës, jo përshkallëzimin e saj. Bllokimi i plotë i protestuesve apo përdorimi i forcës në mënyrë të tepruar është kritikuar në disa raste si veprim që mund të rrisë tensionet në vend që t’i ulë ato.

Në këtë kuptim, praktika tregon një balancë të vështirë mes ruajtjes së rendit publik dhe garantimit të të drejtës për protestë, ku çdo rast vlerësohet sipas rrethanave konkrete dhe nivelit të rrezikut të krijuar në terren”, tha ai.

/rtsh.al/