Në Baltëz të Fierit është zhvilluar paraditen e sotme ceremonia përkujtimore me rastin e 2-vjetorit të rënies në krye të detyrës të efektivit të Policisë së Shtetit, Novruz Çenalia.

Në këtë ceremoni të mbushur me ndjenjë respekti dhe dhimbjeje morën pjesë , drejtori i Drejtorisë Vendore të Policisë Fier, Erjon Ahmeti, kolegé dhe punonjës të Policisë së Shtetit si dhe të afërm e familjarë.

Në nderim të veprës dhe jetës së tij, pjesëmarrësit vendosën kurora me lule pranë varrit të efektivit Çenalia, duke përkujtuar jo vetëm aktin e tij të sakrificës, por edhe vlerat njerëzore dhe profesionale që e karakterizonin.

Drejtori Ahmeti, teksa u bëri të ditur familjarëve se në këtë 2-vjetor efektivit Çenalia i është akorduar statusi i “Dëshmorit të Atdheut”, theksoi se sakrifica e tij do të qëndrojë përherë në piedestalin më të lartë të Policisë së Shtetit.

Çenalia u vra mesditën e 13 majit 2024, gjatë ushtrimit të detyrës, pasi ndaloi një automjet dhe i kërkoi drejtuesit të mos lëvizte me shpejtësi në rrugë.

 Autori i krimit, Azgan Merrnica, reagoi me armë zjarri duke e qëlluar për vdekje efektivin e policisë.

Ngjarja u konsiderua një sulm i rëndë ndaj uniformës së shtetit dhe rendit publik, ndërsa autori i vrasjes u dënua me 35 vite burg nga Gjykata dhe aktualisht vuan dënimin në IEVP Fier. Ky vendim u shoqërua me reagime të forta nga opinioni publik, duke e cilësuar aktin si një goditje të rëndë ndaj strukturave të rendit.

Ceremonia e sotme në Baltëz shënoi jo vetëm kujtimin e një efektivi që ra në krye të detyrës, por edhe nderimin e tij si “Dëshmor i Atdheut”, duke e vendosur sakrificën e Novruz Çenalia në kujtesën institucionale dhe shoqërore si një shembull i përjetshëm i përkushtimit ndaj detyrës dhe mbrojtjes së rendit publik.

/rtsh.al/