Ministri i Drejtësisë, Toni Gogu, deklaroi nga Shkodra se Harta e re Gjyqësore nuk është shfrytëzuar ende në të gjithë potencialin e saj dhe se rishikimi i saj do të bëhet pasi të plotësohen të gjitha gjykatat me gjyqtarë përkatës.

“Harta gjyqësore rishikohet çdo pesë vjet nga Këshilli i Lartë Gjyqësor, por unë besoj se ende nuk kemi përdorur të gjitha potencialet që ajo ka. Këtë duhet ta shohim pasi të plotësojmë të gjitha gjykatat me gjyqtarë. Në radhë të parë, hartën që kemi duhet ta optimizojmë maksimalisht”, tha Gogu.

Ai u ndal edhe te zvarritja e çështjeve, duke shpjeguar se aktualisht janë rreth 130 mijë çështje në proces.

 “Po bëjmë standardizimin e statistikave me KLGJ-në, që të mund të lexojmë çështjet njësoj. Problemi kryesor është mungesa e gjyqtarëve, shumë prej tyre nuk kanë kaluar sprovën e integritetit dhe po zëvendësohen”, theksoi ministri.

I pyetur nëse jepet drejtësi me standarde të dyfishta, Gogu theksoi: “Standardizimi dhe standardi europian i drejtësisë është thelbi kryesor i reformës. Ne duhet ta sjellim atë standard në çdo sallë gjykate!”

/rtsh.al/