Një efektiv policie është dërguar për gjykim, nën akuzën e përndjekjes së ish-të dashurës së tij. Prokuroria e Fierit përfundoi hetimet dhe dërgoi në gjyq A.M., punonjës policie, pasi përndoqi ish-të dashurën e tij që ishte ndarë pas 17 vitesh lidhje.

Sipas hetimeve, në datën 10 shkurt 2025, shtetasja L.C. ka bërë kallëzim ndaj A.M., me të cilin kishte një lidhje 17-vjeçare, e cila u ndërpre në vitin 2024. Pas ndarjes, A.M. dyshohet se e ka ngacmuar të dëmtuarën në mënyrë të përsëritur, duke përdorur komunikime telefonike dhe takime fizike, si dhe duke i ushtruar presion psikologjik, duke shkaktuar gjendje të vazhdueshme ankthi dhe frike për sigurinë e saj personale.

Hetimi i plotë i prokurorisë tregoi se A.M. ka konsumuar elementët e veprës penale “Përndjekja”, duke e bërë këtë rast një shembull të rëndësishëm për adresimin e dhunës psikologjike dhe ngacmimeve pas përfundimit të një lidhjeje afatgjatë.

/rtsh.al/