Kremlini ka bërë të ditur se presidenti rus Vladimir Putin ka zhvilluar një bisedë telefonike me presidentin e Emirateve të Bashkuara Arabe, Sheikh Mohamed bin Zayed Al Nahyan, ku u trajtua gjerësisht situata e tensionuar në Lindjen e Mesme, duke përfshirë konfliktin që përfshin Iranin.

Të dy liderët theksuan rëndësinë e vazhdimit të procesit politik dhe diplomatik për të arritur marrëveshje paqeje bazuar në kompromise dhe respektimin e interesave legjitime të të gjitha palëve në rajon.

Ata u shprehën për nevojën urgjente të një zgjidhjeje paqësore përmes dialogut, duke shmangur përshkallëzimin e mëtejshëm të konfliktit.

Putin u shpreh i gatshëm të transmetojë në Teheran shqetësimet e Emirateve të Bashkuara Arabe lidhur me sulmet iraniane ndaj territorit të tyre.

Sheikh Mohamed bin Zayed theksoi se UAE nuk po përdoret si bazë për sulme kundër Iranit, prandaj sulmet iraniane nuk mund të justifikohen.

Liderët ranë dakord për nevojën e një armëpushimi të menjëhershëm dhe kthimit në rrugën diplomatike.

Ky telefonatë vjen në një kontekst tensionesh të larta në Lindjen e Mesme pas përshkallëzimit të konfliktit mes Iranit, Izraelit dhe SHBA-së, me sulme raketore dhe kundërpërgjigje që kanë prekur edhe vende arabe.

Rusia, si një aktor me ndikim në rajon, po luan rol ndërmjetësues duke mbajtur kontakte me të gjitha palët. Biseda konfirmon përpjekjet e Moskës për de-eskalim dhe zgjidhje diplomatike të krizës iraniane.

/rtsh.al/