Charles Leclerc do të jetë pilot i Ferrari-t edhe për shumë vite të tjera. Lajmi është bërë i ditur nga skdueria italiane, që ka komunikuar zyrtarisht rinovimin shumëvjeçar të kontratës me pilotin francez.

“Skuderia Ferrari njofton rinovimin me Charles Leclerc, i cili do të vazhdojë të veshë ngjyrat e skuadrës sonë në sezonet e ardhshme të kampionatit botëror të Formula 1”, – shkruhet në komunikatën e Ferrari-t.

Lidhja mes Leclerc dhe Ferrari-t ka filluar përpara debutimit të tij në Formula 1. Ai ka qenë pjesë e Ferrari Driver Academy në 2016-ën dhe kjo skuderi ka qenë gjithmonë në qendër të karrierës së pilotit francez: nga fitimi i titullit të Formula 2 në 2017-ën te debutimi në Formula 1 vitin pasardhës. Që atëherë Charles ka qenë një figurë qendrore te kjo skuadër.

“Nuk mund të isha më i lumtur nga vazhdimi i këtij rrugëtimi me skuderinë Ferrari, – ka thënë Leclerc pas rinovimit. – Për mua ka qenë gjithmonë më shumë se thjesht një skuadër. Është skuadra që kam dashur dhe kam ëndërruar që fëmijë. Pas gjithë këtyre viteve është bërë si një familje e dytë.

Jam mirënjohës që do të vazhdojmë të luftojmë përkrah për objektivin e përbashkët: të rikthejmë titullin botëror në Maranello. Të jem një pilot i Ferrari-t është një ëndërr, por edhe një përgjegjësi. Do të jap gjithçka për ta çuar këtë skuadër aty ku e meriton”.