Policia e Tiranës ka vënë në pranga rojen e një banke të nivelit të dytë pasi dyshohet për shpërdorim detyre, në vijim të hetimeve për zbardhjen e vjedhjes së ndodhur një ditë më parë në një bankë në rrugën “Sulejman Delvina”.

Sipas njoftimit zyrtar, specialistët e Seksionit për Hetimin e Krimeve ndaj Pronës, në bashkëpunim me Prokurorinë, kanë arrestuar në flagrancë shtetasin F. Ç., 60 vjeç, punonjës i një shoqërie private të sigurisë fizike, i ngarkuar me ruajtjen e objektit bankar.

Nga veprimet hetimore të deritanishme dyshohet se ai është larguar përkohësisht nga vendi i shërbimit gjatë orarit të punës dhe nuk ka marrë masat e nevojshme për sigurimin e ambienteve të brendshme të bankës, duke krijuar kushte për kryerjen e vjedhjes.

Policia bën me dije se hetimet vijojnë në drejtimin e Prokurorisë për dokumentimin e plotë të ngjarjes, si dhe për identifikimin dhe kapjen e autorit të vjedhjes.

“Vijojnë hetimet për zbardhjen e vjedhjes së kryer dje, në një bankë në rrugën “Sulejman Delvina”. 

Arrestohet roja i bankës, i dyshuar për shpërdorim të detyrës. 

Specialistët e Seksionit për Hetimin e Krimeve ndaj Pronës, në vijim të veprimeve hetimore të kryera në drejtimin e Prokurorisë, për zbardhjen e vjedhjes së kryer dje, në një bankë në rrugën “Sulejman Delvina”, arrestuan në flagrancë shtetasin F. Ç., 60 vjeç, punonjës i një shoqërie private të sigurisë fizike, i ngarkuar për ruajtjen e bankës.

Nga veprimet hetimore të deritanishme dyshohet se shtetasi F. Ç. është larguar përkohësisht gjatë orarit të shërbimit dhe nuk ka marrë masat e nevojshme për sigurimin e ambienteve të brendshme të bankës. 

Në bashkëpunim me Prokurorinë vijojnë hetimet intensive për dokumentimin e plotë të rastit, identifikimin dhe kapjen e autorit”, thuhet në njoftim.

Kujtojmë se një ditë më parë, një grabitje ndodhi në një bankë të nivelit të dytë në Tiranë në rrugën “Gjin Bue Shpata”, kur një person i maskuar pasi hyri në ambientet e bankës mori një shumë prej 10-15 mijë paundësh nga një klient i cili po depozitonte paratë.

Sipas dyshimeve paraprake, autori dyshohej se u largua nga vendngjarja me një skuter elektrik.

/rtsh.al/