Në përmbyllje të turit të diplomacisë parlamentare në vendet baltike, Kryetari i Kuvendit të Shqipërisë, Niko Peleshi, u takua në Vilnius me Kryetarin e Parlamentit të Lituanisë (Seimas), Juozas Olekas.

Takimi u fokusua tek mbështetja e Lituanisë për anëtarësimin e Shqipërisë në Bashkimin Europian, duke vlerësuar progresin e vendit tonë në procesin e negociatave dhe duke theksuar rëndësinë e vijimit të politikës së zgjerimit të BE-së si një investim strategjik për paqen, stabilitetin dhe sigurinë e kontinentit.

Gjatë bisedimeve u trajtuan edhe çështje të tjera me rëndësi, si bashkëpunimi parlamentar, siguria europiane, mbështetja për Ukrainën dhe roli i NATO-s në përballimin e sfidave aktuale.

Kryetari Peleshi nënvizoi angazhimin e Shqipërisë për të kontribuar në sigurinë euroatlantike, përfshirë pjesëmarrjen e forcave shqiptare në misionet e NATO-s në vendet baltike, si dhe vendosmërinë për të vijuar reformat në rrugën drejt anëtarësimit të plotë në Bashkimin Europian.

/rtsh.al/