Festivali i Pranverës është hapur me një moment artistik të veçantë, ku vepra e njohur e Vivaldit, “Pranvera”, u interpretua nga Orkestra Simfonike e RTSH-së në bashkëpunim me bendin muzikor, nën drejtimin e Elton Dedës dhe Gjergj Kaçinarit, duke i dhënë festivalit një nisje elegante dhe dinamike.

Hapja u shoqërua gjithashtu me një performancë energjike të trupës së baletit të të rinjve, duke i dhënë festivalit një fillim dinamik dhe modern.

Në rolin e prezantueses, këngëtarja Bleona Qereti e cilësoi rikthimin e festivalit pas 23 vitesh si një moment të rëndësishëm për muzikën shqiptare. Ajo theksoi se festivali, i themeluar nga artisti legjendar Ferdinand Deda, ka qenë historikisht një hapësirë e rëndësishme për lirinë artistike dhe krijimtarinë në një periudhë kur shprehja kulturore ishte më e kufizuar.

“Pas 23 vitesh po rikthejmë një ‘bizhuteri’ që kishte fjetur, për ta zgjuar sërish dhe për t’i dhënë jetë të re. Ky festival ka qenë gjithmonë një strehë për artin dhe për atë që quhet ‘temë e lirë’. Sot është një platformë moderne për artistët e rinj,” u shpreh Qereti.

Ndërkohë, aktori Nik Xhelilaj, gjithashtu në rolin e prezantuesit, e cilësoi festivalin si një vend të veçantë për të gjithë artistët shqiptarë, duke theksuar emocionin e rikthimit në këtë skenë.

“Kur mora ftesën nuk mund ta refuzoja. E ndjej veten si në shtëpinë time këtu, sepse ky festival është shtëpia e këngës shqiptare,” tha Xhelilaj.

Mbrëmja e hapjes shënoi kështu rikthimin e një prej ngjarjeve më të rëndësishme muzikore, duke bashkuar performanca klasike, energji të re artistike dhe mesazhe nostalgjie për historinë e festivalit.

/rtsh.al/