Instituti i Statistikave (INSTAT) ka publikuar të dhënat e Anketës Tremujore të Forcave të Punës për periudhën janar-mars 2026, duke pasqyruar një treg pune me lëvizje të lehta në treguesit kryesorë të punësimit dhe papunësisë. Raporti, i cili bazohet në të dhënat e Censit 2023, është realizuar përmes një kampioni prej 7.906 familjesh në shkallë kombëtare.

Treguesit kryesorë të tregut të punës

Sipas raportit, treguesit për tremujorin e parë të vitit 2026 paraqiten si më poshtë.

Për popullsinë 15-64 vjeç, shkalla e pjesëmarrjes është 76,2%. Krahasuar me tremujorin e parë të vitit 2025, ky tregues ka pësuar një ulje me 0,5 pikë përqindje, ndërsa krahasuar me tremujorin e fundit të 2025-ës, ka shënuar një rritje prej 0,3 pikë përqindje. Shkalla e punësimit për popullsinë 15 vjeç e lart rezulton 58%. Ky tregues shënon një ulje si vjetore (0,3 pikë përqindje), ashtu edhe tremujore (0,5 pikë përqindje).

Shkalla e papunësisë për popullsinë 15 vjeç e lart vlerësohet në 8,4%. Krahasuar me tremujorin e parë të 2025-ës, papunësia është ulur me 0,3 pikë përqindje, ndërsa ndaj tremujorit të mëparshëm ka një rritje të lehtë prej 0,1 pikë përqindje.

Saktësia e vlerësimeve

INSTAT thekson se rezultatet e Anketës së Forcave të Punës janë vlerësime statistikore dhe jo shifra ekzakte. Për këtë arsye, çdo tregues shoqërohet me një interval besimi (për nivelin 95%):

“Shkalla e papunësisë për popullsinë 15+ vjeç vlerësohet 8,4 %, me një devijim standard prej 0,53 %. Kjo tregon se me 95 % besueshmëri vlera reale e shkallës së papunësisë është brenda intervalit 7,3 % deri në 9,4 %.”

Metodologjia dhe cilësia

Anketa është zbatuar në përputhje me standardet e Organizatës Ndërkombëtare të Punës (ILO) dhe Eurostat, duke garantuar krahasueshmërinë me vendet e Bashkimit Evropian. Për këtë tremujor, shkalla e përgjigjes nga familjet e përzgjedhura ka qenë 83%.

INSTAT sqaron se të dhënat janë kalibruar me popullsinë rezidente sipas Censit 2023, ndërsa vlerësimet për punësimin përfshijnë të gjithë personat që kanë punuar të paktën një orë gjatë javës së referencës. Për një analizë më të detajuar, të dhënat e plota janë të disponueshme në databazën statistikore të INSTAT.

/rtsh.al/