Ebrahim Azizi, kryetar i Komisionit për Siguri Kombëtare dhe Politikë të Jashtme të Parlamentit iranian, ka lëshuar një paralajmërim të ashpër ndaj Shteteve të Bashkuara, duke thënë se çdo shkelje e “memorandumit të mirëkuptimit” (MOU) që pritet të nënshkruhet zyrtarisht të premten, do të përballet me një “përgjigje shkatërruese”.

Në një postim në rrjetet sociale, Azizi theksoi se rezistenca iraniane ka detyruar një ndryshim strategjik nga ana amerikane.

“Irani e detyroi Uashingtonin të vijë në tryezë në kushtet e tij. Tani, Uashingtoni duhet të provojë angazhimin e tij duke ndalur luftën kundër Libanit dhe duke respektuar çdo klauzolë të MOU-së.

Era e imponimeve të njëanshme kundër iranianëve ka mbaruar”, ka theksuar ai.

Marrëveshja e përkohshme midis Iranit dhe SHBA-së vjen pas një periudhe tensionesh të larta ushtarake, duke përfshirë sulme izraelite në Liban dhe ndërprerje të trafikut detar në Ngushticën e Hormuzit.

Memorandum i mirëkuptimit është nënshkruar tashmë elektronikisht nga Presidenti Donald Trump, zëvendëspresidenti JD Vance dhe zyrtarë iranianë, ndërsa ceremonia zyrtare pritet të zhvillohet të premten.

Marrëveshja përfshin masa si rihapjen e Ngushticës së Hormuzit për trafikun detar; Ndalimin e bllokadës detare amerikane ndaj porteve iraniane; Pezullimin e sanksioneve ndaj naftës iraniane për një periudhë të përkohshme (30-60 ditë); Çlirimin e aseteve të ngrira iraniane dhe ndërprerjen e konflikteve në fronte të ndryshme, veçanërisht në Liban.

Zyrtarët iranianë, duke përfshirë Azizin, kanë insistuar se Teherani nuk ka besim të plotë te Uashingtoni dhe kërkon masa konkrete besimi përpara çdo marrëveshjeje përfundimtare.

Azizi ka përmendur më herët pesë masa kryesore besimi që SHBA-ja duhet të zbatojë, duke përfshirë ndalimin e luftës në Liban dhe lehtësimin e sanksioneve.

“Irani ka dalë fitimtar strategjik nga ky konflikt. Tani është koha që SHBA-ja të tregojë se është serioze në zbatimin e marrëveshjes, përndryshe çdo shkelje do të ketë pasoja të rënda”, tha Azizi në deklarata të mëparshme.

Marrëveshja vjen në një moment delikat. Izraeli ka vazhduar sulmet ndaj pozicioneve të Hezbollahut në Liban, gjë që Teherani e konsideron si shkelje të armëpushimit.

Presidenti iranian Masoud Pezeshkian dhe zyrtarë të tjerë kanë paralajmëruar se sulmet e tilla mund ta bëjnë procesin e paqes “pa kuptim”.

Nga ana tjetër, administrata Trump ka shprehur optimizëm për marrëveshjen, duke thënë se ajo do të çojë në normalizim të trafikut detar dhe ulje të tensioneve. Megjithatë, dyshimet mbeten të thella nga të dyja palët.

/rtsh.al/