Zëvendëskryeministri dhe Ministri i Jashtëm i Italisë, Antonio Tajani, ka konfirmuar zyrtarisht se vendi i tij ka iniciuar kërkesën për vendosjen e sanksioneve ndaj Ministrit të Sigurisë Kombëtare të Izraelit, Itamar Ben Gvir. Deklarata u bë në Bruksel, teksa Tajani po largohej nga samiti para-PPE (Partia Popullore Evropiane).

Sipas kreut të diplomacisë italiane, ky vendim vjen si reagim i drejtpërdrejtë ndaj veprimeve të zyrtarit izraelit lidhur me ndalimin e disa shtetasve italianë, si dhe ndaj deklaratave publike të bëra prej tij në adresë të Romës zyrtare.

“Ne jemi promotorët e kërkesës për sanksione kundër Ministrit Ben Gvir, për atë që bëri gjatë arrestimit të paligjshëm të disa qytetarëve që ishin pjesë e Flotiljes dhe për atë që tha kundër Italisë”, deklaroi ministri Tajani.

I pyetur nga gazetarët nëse masat shtrënguese të Bashkimit Evropian duhet të shtrihen edhe ndaj Ministrit të Financave të Izraelit, Bezalel Smotrich, Tajani la të hapur mundësinë e një vlerësimi në vijim, duke specifikuar se hapat do të ndiqen në mënyrë graduale.

“A duhet të përfshihet edhe Smotrich midis atyre që janë sanksionuar? Do ta shohim për të, ndërkohë le të fillojmë të punojmë me Ben Gvirin”, u shpreh Tajani lidhur me ecurinë e procesit të sanksioneve në kuadër të Bashkimit Evropian.

/rtsh.al/