Presidenti i Iranit, Masoud Pezeshkian, mbërriti të martën në Pakistan për bisedime me zyrtarët e lartë, në kuadër të procesit diplomatik 60-ditor që synon një marrëveshje të përhershme për t’i dhënë fund luftës në Lindjen e Mesme.

Vizita vjen pas negociatave të nivelit të lartë në Zvicër, të udhëhequra nga Zëvendëspresidenti i SHBA-së JD Vance dhe kryetari i parlamentit iranian Mohammad Bagher Qalibaf. 

Në bisedimet u ra dakord për krijimin e një “qelize dekonflikti” për të adresuar luftimet në Liban mes Izraelit dhe Hezbollahut, si dhe për mekanizma që sigurojnë hapjen e Ngushticës së Hormuzit.

SHBA deklaroi se inspektorët e IAEA do të vizitojnë vendet bërthamore iraniane, por Teherani mohoi se janë planifikuar vizita në objektet e bombarduara nga SHBA.  

Pezeshkian paralajmëroi se efektiviteti i bisedimeve varet nga respektimi i plotë i detyrimeve të dakorduara. Ndërkohë, kryeministri izraelit Benjamin Netanyahu ka theksuar se ushtria e tij do të mbajë “liri të plotë veprimi” në Libanin jugor, pavarësisht mekanizmit të ri. 

Presidenti amerikan Donald Trump u shpreh se situata “do të zgjidhet”, duke e cilësuar veten si “zgjidhës problemesh”. Për momentin, armëpushimi i rinovuar në Liban po mbahet, ndërsa pritet një raund i ri bisedimesh mes Izraelit dhe Libanit në Uashington për planin e tërheqjes së Izraelit nga disa zona në jug të Libanit. 

/rtsh.al/