Dy tërmete të fuqishme me magnitudë 7.2 dhe 7.5 kanë goditur Venezuelën, duke shkaktuar të paktën 164 të vdekur dhe mbi 1,000 të plagosur. Ngjarja ka nxitur reagimin e menjëhershëm të bashkësisë ndërkombëtare, ku liderët botërorë kanë ofruar mbështetje konkrete dhe dërgimin e ekipeve të emergjencës për gjetjen e personave të bllokuar nën rrënoja.

Shtetet e Bashkuara të Amerikës kanë konfirmuar nisjen e menjëhershme të ndihmës operative në terren për t’iu përgjigjur krizës.

“Shtetet e Bashkuara i shprehin ngushëllimet më të thella popullit të Venezuelës pas tërmeteve shkatërruese. Po dërgojmë menjëherë ekipe kërkim-shpëtimi, burime mjekësore dhe ndihmë humanitare në Venezuelë”, deklaroi Sekretari i Shtetit i SHBA-së, Marco Rubio.

Nga ana e saj, Franca ka vënë në lëvizje personelin e specializuar për operacione të tilla, duke u koordinuar edhe me strukturat e Bashkimit Evropian.

“Franca është e gatshme, së bashku me partnerët e saj evropianë, të ofrojë ndihmë për popullatat e prekura në përgjigje të nevojave të identifikuara nga autoritetet venezueliane”, shkroi Presidenti francez Emmanuel Macron, duke saktësuar se një ekip prej 85 punonjësish francezë të shpëtimit “po dërgohet menjëherë”.

Brazili ka nisur procedurat zyrtare përmes diplomacisë për të vlerësuar ndihmën e nevojshme për shtetin fqinj.

“Riafirmoj vendosmërinë tonë për të mbështetur qeverinë e Presidentes në detyrë Delcy Rodríguez në rimëkëmbjen e zonave të prekura në këtë komb motër”, u shpreh Presidenti i Brazilit, Luiz Inácio Lula da Silva.

Gatishmëri për mbështetje ka shprehur edhe qeveria kineze përmes një deklarate zyrtare për mediat.

“Kina është e gatshme t’i ofrojë ndihmë Venezuelës med të gjitha aftësitë e saj, sipas nevojave të Venezuelës”, tha zëdhënësi i Ministrisë së Jashtme të Kinës, Guo Jiakun.

Ndërkaq, mesazhe solidariteti janë përcjellë edhe nga drejtuesit e Spanjës dhe Kolumbisë.

“Gjithë mbështetja ime dhe e Spanjës për popullin venezuelian pas tërmeteve shkatërruese të natës së kaluar. Mendimet tona janë me viktimat dhe familjet e tyre”, deklaroi Kryeministri spanjoll Pedro Sánchez.

“Unë jam në solidaritet të plotë me popullin vëllazëror të Venezuelës pas tërmetit shkatërrues. Kolumbia është me ju gjatë kësaj kohe të vështirë me dashuri, respekt dhe shpresë”, deklaroi Presidenti i sapozgjedhur i Kolumbisë, Abelardo de la Espriella.

/rtsh.al/