Edhe pse temperaturat kanë kaluar 30 gradë Celsius, autokombanjat vijojnë punën në arat me grurë. Qemal Elezi, autokombanier prej shumë dekadash, thotë se sezoni i korrjes po shkon drejt përfundimit dhe se kanë mbetur edhe pak ditë punë.

Sipas tij, këtë vit sipërfaqet e mbjella kanë qenë më të vogla krahasuar me vitet e kaluara, por prodhimi ka rezultuar cilësor, i pastër dhe pa lëndë të huaja.

Nga përvoja shumëvjeçare në këtë profesion, Elezi shprehet se buka e prodhuar nga gruri i arave vendase ka vlera më të larta ushqyese dhe është më e shëndetshme.

Ndërkohë, në zonat malore mbi 700 metra mbi nivelin e detit, si Shishtaveci, Novoseji dhe Topojani, korrja e grurit pritet të nisë disa ditë më vonë. Temperaturat më të ulëta në këto zona bëjnë që pjekja e grurit të vonohet në krahasim me pjesën tjetër të qarkut.

Gazetar: D. Shehu  

/rtsh.al/