Një tentativë për trafikim të lëndëve narkotike është goditur në Pikën e Kalimit Kufitar të Aeroportit “Nënë Tereza” në Rinas, gjatë kontrolleve të ushtruara nga Administrata Doganore në bashkëpunim me Policinë e Shtetit.

Gjatë kontrollit me skaner të bagazheve të pasagjerëve të një fluturimi me itinerar Toronto–Rinas, u identifikuan dy valixhe me përmbajtje të dyshimtë.

Pas kontrollit fizik të kryer në prani të poseduesve, në bagazhe u gjetën dhe u sekuestruan 46 kilogramë lëndë narkotike e dyshuar si Cannabis sativa, e ndarë në 89 paketime.

Personat e përfshirë në këtë rast, së bashku me lëndën narkotike të sekuestruar, janë dorëzuar te strukturat e Policisë së Shtetit, ku po vijojnë veprimet procedurale dhe hetimet për zbardhjen e plotë të rastit.

Administrata Doganore bëri me dije se mbetet e angazhuar në forcimin e kontrolleve kufitare dhe bashkëpunimin me agjencitë ligjzbatuese për parandalimin dhe goditjen e trafikimit të lëndëve narkotike dhe veprimtarive të paligjshme.

/rtsh.al/