Sekretari i Përgjithshëm i NATO-s, Mark Rutte, ka hapur punimet e samitit dyditor të Aleancës në Ankara, duke bërë thirrje për më shumë bashkëpunim mes vendeve anëtare, rritje të investimeve në mbrojtje dhe përshpejtim të prodhimit ushtarak.

Rutte tha se NATO është si një ekip që nuk fiton vetëm nga një lojtar i vetëm.

“Askush nuk fiton vetëm. NATO është pak a shumë e njëjta”, tha Rutte, duke nënvizuar se suksesi i Aleancës varet nga bashkëpunimi mes udhëheqësve politikë, forcave të armatosura dhe industrisë së mbrojtjes.

Sipas tij, NATO ka bërë përparime të rëndësishme pas samitit të mëparshëm, duke rritur shpenzimet për mbrojtjen, por tashmë sfida kryesore është që këto fonde të shndërrohen në kapacitete konkrete ushtarake.

“Paratë janë aty dhe shumë më tepër po vijnë. Por këto para duhet të vihen në punë”, u shpreh ai.

Rutte paralajmëroi se Rusia, Kina dhe Koreja e Veriut po thellojnë bashkëpunimin ushtarak dhe përbëjnë sfida të reja për sigurinë ndërkombëtare.

“Rusia po derdh pothuajse gjysmën e buxhetit të saj kombëtar në makinerinë e saj të luftës”, tha ai, duke shtuar se Kina po modernizon forcat e saj të armatosura dhe po zgjeron kapacitetet bërthamore pa transparencë të mjaftueshme.

Përballë këtyre zhvillimeve, Rutte kërkoi një “revolucion industrial transatlantik të mbrojtjes”, me rritje të prodhimit ushtarak dhe më shumë koordinim mes vendeve të NATO-s.

“Strategjia është e qartë, por ndeshja është larg përfundimit. Për ta fituar atë, ne kemi nevojë që të gjithë anëtarët e ekipit të bëjnë më shumë, më shpejt dhe së bashku. Nuk kemi luksin e kohës”, deklaroi ai.

Në samit, NATO ka njoftuar edhe plane të reja për forcimin e kapaciteteve mbrojtëse. Aleanca do të investojë rreth 40 miliardë dollarë në aftësitë kundër dronëve, si dhe do të rrisë kapacitetet e mbikëqyrjes ajrore.

/rtsh.al/