Kryeministri Edi Rama, gjatë vizitës së tij në Ankara të Turqisë, ka zhvilluar një takim zyrtar me Presidentin e Turqisë, Recep Tayyip Erdogan. Rama u prit në Pallatin Presidencial, Cumhurbaşkanlığı Külliyesi, ku zhvilloi bisedime me presidentin turk.

Gjatë takimit, Rama dhe Erdogan zhvilluan bisedime së bashku me delegacionet përkatëse, ku në fokus ishin marrëdhëniet dypalëshe dhe çështje me interes të përbashkët. Rama shoqërohej në këtë vizitë nga ministri për Evropën dhe Punët e Jashtme, Ferit Hoxha, si dhe ministri i Mbrojtjes, Ermal Nufi.

Vizita e Ramës në Ankara u zhvillua në kuadër të pjesëmarrjes së tij në samitin dyditor të NATO-s, ku liderët e vendeve aleate ranë dakord për forcimin e kapaciteteve mbrojtëse, rritjen e investimeve në mbrojtje, modernizimin ushtarak, koordinimin e politikave të sigurisë, si dhe vijimin e mbështetjes për Ukrainën.

Një nga vendimet kryesore të samitit ishte edhe përcaktimi i Shqipërisë si vendi pritës i Samitit të NATO-s në vitin 2027.

/rtsh.al/