Kryeministri izraelit Benjamin Netanyahu ka deklaruar se lufta kundër Iranit nuk ka përfunduar plotësisht, pavarësisht goditjeve të rënda të shkaktuara regjimit të Teheranit.

Ai theksoi se Izraeli do të vazhdojë të mbajë praninë ushtarake në Liban jugor për aq kohë sa të jetë e nevojshme për sigurinë e tij.

Në deklaratat e tij për mediat izraelite dhe në adresime publike, Netanyahu tha se “regjimi iranian ka pësuar një goditje të rëndë, por lufta nuk ka mbaruar ende. Para nesh dalin sfida të reja. Politika jonë është e qartë: Irani nuk do të posedojë kurrë armë bërthamore, qoftë me marrëveshje apo pa marrëveshje.”

Ai përsëriti pretendimin se nëse Izraeli nuk do të kishte vepruar me kohë, Irani tashmë do të kishte armë bërthamore.

Netanyahu ka theksuar disa herë se operacionet ushtarake izraelite (dhe bashkëpunimi me SHBA) kanë degraduar ndjeshëm aftësitë bërthamore, raketore dhe ushtarake të Iranit, por ende mbeten elemente kyçe si uraniumi i pasuruar, vendet e pasurimit dhe rrjeti i proxy-ve (si Hezbollah).

Netanyahu deklaroi se forcat izraelite do të mbeten në zonat e sigurisë në Liban jugor “për aq kohë sa të jetë e nevojshme”, pavarësisht marrëveshjeve të arritura midis SHBA-së dhe Iranit ose Libanit. Ai e justifikoi këtë me nevojën për të mbrojtur kufijtë veriorë të Izraelit nga Hezbollah, grupi i mbështetur nga Irani.

Ministri i Mbrojtjes izraelit, Israel Katz, ka qenë edhe më i prerë, duke thënë se Izraeli nuk do të tërhiqet nga zonat e pushtuara në Liban dhe se çdo sulm nga Irani do të përballet me “forcë të plotë”.

/rtsh.al/