Qeveria ka miratuar dy vendime të reja që lidhen me përdorimin e Fondit të Rindërtimit për vitin 2026, duke alokuar një vlerë totale prej afërsisht 475 milionë lekësh (pa TVSH) për bashkitë Kurbin dhe Shijak. Këto fonde do të shërbejnë për financimin e procesit të rindërtimit nga e para, si dhe për riforcimin e banesave individuale të dëmtuara rëndë nga fatkeqësitë natyrore.

Rindërtimi nga e para i banesave individuale

Vendimi i parë përcakton përdorimin e një fondi prej 418,097,430 lekësh për ato objekte që janë klasifikuar si të pabanueshme dhe që kërkojnë rindërtim total. Sipas dokumentit zyrtar, ky fond do të përdoret “për financimin e rindërtimit të banesave individuale për ata individë, të cilët përfitojnë nga grantet e rindërtimit, banesat e të cilëve janë klasifikuar si objekte, që duhen rindërtuar nga e para, në bazë të aktekspertizave të thelluara, në bashkitë Kurbin dhe Shijak”.

Ndarja e këtij buxheti specifikon se pjesa dërrmuese do t’i kalojë Bashkisë së Kurbinit me 407,196,804 lekë (pa TVSH), ndërsa Bashkisë së Shijakut i transferohen 10,900,626 lekë (pa TVSH).

Riforcimi i godinave me shkallë dëmtimi DS4 

Paralelisht, përmes një vendimi të dytë, qeveria ka miratuar një fond shtesë prej 57,478,717.28 lekësh (pa TVSH), i cili do të dedikohet specifikisht për ndërhyrjet e thella në strukturat ekzistuese. Bëhet fjalë për objektet që nuk kanë nevojë të rindërtohen nga themelet, por kërkojnë rikonstruksion të plotë. 

Teksti i vendimit saktëson destinacionin e këtyre fondeve “për financimin e riforcimit të banesave individuale për ata individë, banesat e të cilëve janë klasifikuar si objekte të dëmtuara rëndë, që rezultojnë me shkallë dëmi DS4 dhe që nuk duhen rindërtuar nga e para, por kanë nevojë për punime rikonstruksioni”.

Nga ky fond për riforcim, Bashkia e Kurbinit përfiton 43,220,255.28 lekë (pa TVSH), ndërkohë që për Bashkinë e Shijakut janë alokuar 14,258,462 lekë (pa TVSH).

Administrimi dhe burimi i financimit

Për të dyja vendimet, Këshilli i Ministrave ka përcaktuar se efekti financiar do të përballohet nga shpenzimet e miratuara për fondin e rindërtimit të buxhetit të vitit 2026. Këto shuma financiare do t’u kalojnë dy njësive të qeverisjes vendore në formën e “transfertës së pakushtëzuar”.

Për zbatimin e këtyre dy vendimeve, të cilat hyjnë në fuqi menjëherë dhe botohen në Fletoren Zyrtare, janë ngarkuar drejtpërdrejt Ministria e Infrastrukturës dhe Energjisë, Ministria e Financave, si dhe vetë bashkitë përfituese, Kurbin e Shijak.

/rtsh.al/