Kryenegociatori i Iranit dhe kryetari i Parlamentit, Mohammad Bagher Ghalibaf, ka deklaruar se Republika Islamike “nuk ka zgjidhje tjetër veçse të mbështetet në forcën e vet dhe të bëhet më e fortë”, duke akuzuar Shtetet e Bashkuara se synojnë të godasin Iranin dhe të avancojnë interesat e tyre sa herë që kanë mundësi.

“Nuk është çështje vetëm lufte, negociatash apo vetëm i këtij presidenti aktual amerikan”, tha Ghalibaf në një deklaratë të publikuar në rrjetet sociale. Sipas tij, qasja e Iranit ndaj luftës apo negociatave duhet të bazohet në interesat kombëtare dhe sigurinë, të jetë realiste dhe afatgjatë.

“Prandaj, ne nuk kemi zgjidhje tjetër veçse të mbështetemi në forcën tonë dhe të forcohemi”, theksoi ai.

Deklarata vjen në një kontekst tensionesh të vazhdueshme midis Iranit dhe SHBA-së, ku Teherani thekson nevojën për gatishmëri të plotë mbrojtëse, ndërkohë që nuk e mbyll plotësisht derën e diplomacisë.

Ghalibaf, si një nga figurat kryesore politike iraniane, ka përsëritur shpesh pozicionin se vendi duhet të jetë i përgatitur për çdo skenar, duke ruajtur një linjë të fortë në negociatat eventuale.

/rtsh.al/