Ministri i Bujqësisë dhe Zhvillimit Rural, Andis Salla, zhvilloi një vizitë në Bashkinë Peqin, ku së bashku me kryetarin e bashkisë, Bukurosh Maçi, u ndal në pikën e grumbullimit të Fation Terbumit, një sipërmarrje që shërben si urë lidhëse mes fermerëve të zonës dhe tregjeve vendase e ndërkombëtare.

Gjatë vizitës, ministri vlerësoi modelin e bashkëpunimit të kësaj pike grumbullimi, e cila, përveç tregtimit të prodhimit të fermës së saj, bashkëpunon ngushtë me fermerët e Bashkisë Peqin, duke krijuar një zinxhir të qëndrueshëm vlere për prodhimet bujqësore të zonës.

Nga kjo pikë grumbullimi, produktet Made in Albania eksportohen në Kosovë, Maqedoninë e Veriut, vendet e Ballkanit dhe më gjerë në tregun europian, duke dëshmuar potencialin në rritje të bujqësisë shqiptare.

Ministri Salla theksoi se organizimi i fermerëve në shoqëri bashkëpunimi po krijon më shumë mundësi për rritjen e prodhimit, garantimin e cilësisë dhe zgjerimin e tregjeve. Ai nënvizoi gjithashtu se skema e kompensimit në masën 10% të vlerës së faturave të shitjes po nxit formalizimin e sektorit, rrit të ardhurat e fermerëve dhe forcon konkurrueshmërinë e prodhimit vendas, duke mbështetur zhvillimin e qëndrueshëm të bujqësisë shqiptare.

/rtsh.al/