Protesta e organizuar në Tiranë ka shënuar sot ditën e saj të 51-të. Protestuesit u grumbulluan fillimisht në sheshin “Skënderbej”, nga ku nisi edhe koordinimi i lëvizjes së tyre. Më pas, ata nisën një marshim përgjatë bulevardit “Dëshmorët e Kombit” në drejtim të godinës së Kryeministrisë, duke shprehur publikisht qëndrimet e tyre.

Gjatë marshimit, pjesëmarrësit mbanin në duar pankarta me mesazhe të ndryshme dhe flamuj kombëtarë.

Përveç kauzës mjedisore, organizatorët dhe pjesëmarrësit kanë shpalosur edhe një agjendë me kërkesa më të gjera institucionale. Ndër pikat kryesore të artikuluara prej tyre është kërkesa për shfuqizimin e menjëhershëm të ndryshimeve në ligjin për zonat e mbrojtura. Po ashtu, ata kërkojnë reformimin e ligjit aktual zgjedhor dhe një ndryshim rrënjësor në skenën politike, duke bërë thirrje për largimin e asaj që e konsiderojnë si “kasta e vjetër politike e vendit”.

Pasi përshkuan bulevardin, protestuesit u ndalën përpara institucionit të Kryeministrisë nga ku po mbahen edhe fjalimet e rastit nga përfaqësues të ndryshëm të tubimit, të cilët argumentuan qëndrimet e tyre dhe ritheksuan se aksioni i tyre do të vijojë.

/rtsh.al/