Deputeti i Partisë Demokratike, Oerd Bylykbashi, ka reaguar pas vendimit të Kuvendit për të mos zgjatur mandatin e Komisionit të Posaçëm për Reformën Administrativo-Territoriale, duke e cilësuar këtë një goditje ndaj një prej reformave më të rëndësishme në vend.

Sipas Bylykbashit, votimi i sotëm shënon fundin e një procesi që duhej të realizohej me konsensus mes palëve politike.

“Ajo që u lejua sot të votohet për të mbyllur Komisionin e Territoriales, duke mos zgjatur afatin, është kambanë e madhe alarmi. Jo vetëm që vret një nga reformat më të rëndësishme që duhej të bëhej në këtë vend, e cila ka të bëjë drejtpërdrejt me qeverisjen që do të dalë nga vota e lirë, por ka të bëjë edhe me qeverisjen e përditshme”, tha Bylykbashi.

Deputeti demokrat akuzoi mazhorancën se synon të shmangë procesin gjithëpërfshirës dhe konsensual që, sipas tij, kërkohet edhe nga Bashkimi Europian.

“Ajo që ju synoni është të prishni gjithëpërfshirjen dhe konsensualitetin që e kërkon edhe Bashkimi Europian dhe ta bëni reformën si doni ju”, u shpreh ai.

Bylykbashi paralajmëroi se i njëjti skenar do të ndiqet edhe për Komisionin e Posaçëm për Reformën Zgjedhore.

“Kjo është kambanë që tregon se çfarë do të bëni ju edhe me reformën zgjedhore. Dy reformat më të rëndësishme do t’i vrisni pikërisht në të njëjtën formë”, tha ai.

/rtsh.al/