Turqia ka deklaruar se pakti i përbashkët i mbrojtjes i nënshkruar me Arabinë Saudite dhe Pakistanin nuk i drejtohet asnjë vendi të veçantë.

Burhanettin Duran, drejtori i Komunikimit i zyrës së presidentit Erdogan ka deklaruar se “marrëveshja e Mekës, e cila nuk synon asnjë vend të caktuar, do të forcojë sigurinë e përbashkët dhe parandalimin kolektiv të tre kombeve… duke dhënë kështu kontribute të rëndësishme në ruajtjen e paqes dhe stabilitetit në rajonin tonë”.

Duran e cilësoi paktin si “një hap historik” që forcon historinë e përbashkët, lidhjet e thella vëllazërore dhe frymën e fortë të solidaritetit mbi baza strategjike.

Ai shtoi se Turqia, nën udhëheqjen e presidentit Recep Tayyip Erdoğan, mbetet e përkushtuar për të kontribuar në paqen, sigurinë dhe stabilitetin rajonal e global përmes bashkëpunimit strategjik me vendet mike dhe vëllazërore, në një mjedis gjithnjë e më kompleks të sigurisë botërore.

Sipas tij, marrëveshja pasqyron determinimin e tre vendeve për të mbajtur vlerat e përbashkëta dhe për të ndërtuar arkitekturën e ardhshme të sigurisë përmes solidaritetit.

Duran shprehu gjithashtu shpresën se marrëveshja do t’u sjellë përfitime tre vendeve vëllazërore dhe do të forcojë më tej vëllazërinë e thellë si dhe bashkëpunimin strategjik mes Turqisë, Arabisë Saudite dhe Pakistanit.

/rtsh.al/