Një nga të dyshuarit kryesorë për sabotimin e gazsjellësve Nord Stream, ukrainasi Volodymyr Zhuravlev, është arrestuar në Kroaci, në një zhvillim të pazakontë që lidhet drejtpërdrejt me një film të ri hollivudian për shpërthimet e vitit 2022.

Zhuravlev u ndalua të mërkurën në qytetin e Pulës, në bazë të një urdhër-arresti europian të lëshuar nga autoritetet gjermane. Ai dyshohet se ka qenë pjesë e grupit të zhytësve ukrainas që, sipas prokurorëve gjermanë, vendosën eksplozivët në tubacionet Nord Stream në Detin Baltik.

Por rasti ka marrë një kthesë të pazakontë. Sipas mediave gjermane, Zhuravlev ndodhej në Kroaci si konsulent për filmin “Snake Island”, me regji të Doug Liman, ku interpretojnë aktorët e njohur Sean Penn dhe Adrien Brody. Filmi trajton pikërisht ngjarjet dhe dyshimet rreth sabotimit të Nord Stream.

Në Zagreb, ditët e fundit, një ekip xhirimi ishte vendosur pranë hotelit “Esplanade”, ku u panë edhe Brody dhe regjisori Liman. Pjesë të tjera të filmit pritej të xhiroheshin në Pulë, ku ndodhi edhe arrestimi i Zhuravlev.

Prokuroria Federale gjermane e përshkruan ukrainasin si një zhytës profesionist dhe me përvojë. Sipas autoriteteve gjermane, ai ishte pjesë e një grupi të drejtuar nga një tjetër ukrainas, Serhii K., i cili u ekstradua në Gjermani nga Italia në vitin 2025.

Të dy të dyshuarit kanë mohuar përfshirjen në shpërthimet e Nord Stream. Edhe qeveria ukrainase ka mohuar çdo përfshirje në sabotim.

Zhuravlev kishte arritur më herët t’u shpëtonte autoriteteve gjermane. Në vitin 2024, ai u largua nga Polonia drejt Ukrainës, pasi një urdhër-arresti europian nuk u ekzekutua. Sipas raportimeve të mediave gjermane, ai dyshohet se u largua nga Polonia i fshehur në bagazhin e një automjeti diplomatik.

Tashmë mbrojtja e tij pritet të kundërshtojë ekstradimin drejt Gjermanisë. Avokati polak i Zhuravlev, Tymoteusz Paprocki, e ka cilësuar çështjen si një provë për funksionimin e ligjit europian, pasi një gjykatë polake kishte refuzuar më herët ekzekutimin e të njëjtit urdhër-arrest.

Rasti merr një dimension edhe më të pazakontë për shkak të lidhjes së të dyshuarit me filmin që po rikrijon në ekran pikërisht ngjarjen për të cilën ai kërkohet nga drejtësia gjermane.