Thesari i Shteteve të Bashkuara pritet të zgjerojë fushën e sanksioneve dytësore që mund t’i vendosë ndaj subjekteve dhe vendeve që mbajnë lidhje biznesi me Iranin, ndërsa administrata Trump përpiqet të rrisë presionin ekonomik ndaj Teheranit, tha për Reuters një burim i njohur me planet.

Ky veprim synon t’u japë një paralajmërim përfundimtar vendeve që të ndërpresin lidhjet e tyre biznesore me Iranin, në përpjekje për t’i dhënë fund konfliktit gati gjashtëmujor që ka bllokuar Ngushticën e Hormuzit dhe eksportet e energjisë nga Gjiri, tha burimi, i cili foli me kushtin e anonimatit sepse nuk ishte i autorizuar të fliste publikisht për këtë çështje.

Sekretari i Thesarit të SHBA-së, Scott Bessent, pritet të shpallë më shumë detaje për veprimet ndaj Iranit.

Sipas burimit, Bessent synon gjithashtu të japë një pasqyrë më të gjerë të fushatës së presionit ekonomik kundër Iranit, të cilën ai dhe presidenti amerikan Donald Trump e kanë quajtur “D-Day ekonomik”, dhe do t’ua bëjë të qartë vendeve se duhet të qëndrojnë me SHBA-në, ose të rrezikojnë që kompani dhe subjekte kyçe të tyre të shkëputen nga sistemi financiar i bazuar në dollar.

/rtsh.al/