Bllokohen 80 litra lëndë të dyshuar insekticide pa dokumentacion shoqërues gjatë kontrollit të ushtruar sot në Portin e Durrësit, në vijën e dytë të kontrollit për mjetet e rënda.
Autoritetet doganore kanë konstatuar një sasi mallrash të padeklaruara.
Dogana e Durrësit bën të ditur se gjatë kontrollit të ushtruar sot në Portin e Durrësit, në vijën e dytë të kontrollit për mjetet e rënda, është konstatuar një sasi mallrash të padeklaruara.
Sipas njoftimit, në një furgon që kishte mbërritur me tragetin e linjës Bari–Durrës, u gjetën 80 bidona plastikë, secili me kapacitet 1 litër, të mbushur me lëndë të dyshuar insekticide, pa dokumentacionin përkatës shoqërues.

Mjeti së bashku me mallrat e bllokuara janë kaluar pranë organeve kompetente për vijimin e procedurave ligjore.

Dogana e Durrësit thekson se kontrollet e rrepta në port vijojnë me qëllim parandalimin e hyrjes së produkteve të padeklaruara dhe garantimin e sigurisë së tregut dhe mbrojtjes së konsumatorit.

/rtsh.al/